ريفيو: كلاريسونيك بلس

by - January 08, 2015



 السلام عليكم و رحمة الله و بركاته 
اول موضوع لي على هذا البلوق هو عن جهاز الكلاريسونيك و انطباعي الاول بعد استخدامه لمدة ٣ اسابيع تقريبا.
اول شي بتكلم عن الجهاز اللي عندي و بعدين عن تجربتي و ان شاء الله بعد فترة برد انزل موضوع عن اي تغير في بشرتي.
ان شاء الله تستفيدون من الموضوع و اللي حابة تستفسر اكثر تتواصل وياي في الكومنتس او على الانستاقرام. 
 جهاز الكلارسونك فيه منه عدة انواع منها الميا و الأريا و البلس و غيرهم واللي يختلف بين الأجهزة اللي ذكرتهم هو:
 السرعة اللي تتذبذب فيها فرشة الجهاز.
وضع الجسم اللي ما يتوفر في كل الانواع.

 كل اجهزة كلاريسونيك مضادة للماي يعني ممكن استخدامها فالشاور و تنشحن بشاحن مغناطيسي.

هذي الصفحة في موقع الكلاريسونك توضح الفرق بين منتجاتهم
و انا بتكلم عن الجهاز اللي عندي اللي هو البلس
جهاز البلس هو الاصدار اللي يتوفر فيه وضع الجسم و فيه ٣ سرعات لوضع الوجه و نوعين ٢ ذبذبات لوضع الجسم.
الجهاز فيه حبتين (او زرين) واحد لتشغيل الجهاز و الثاني لتغيير السرعة.
الليتتين اللي تحت فرشة الجهاز (واضحين فالصور) هم لتوضيح اي سرعة الجهاز يكون مشتغل عليها. 

:وضع الجسم
ذبذبة "النبض": ليت احمر تحت
ذبذبة متواصلة: ليت احمر فوق

وضع الوجه: 
سرعة بطيئة: ليت اخضر - الليت الأخضر اساساً يطلع يوم الجهاز مشتغل يعني السرعة البطيئة مالها ليت
سرعة متوسطة: ليت احمر تحت 
سرعة سريعة: ليت احمر فوق
يوم اشتريت جهاز البلس، 
ويا الجهاز كان: 
قاعدة للشحن 
فرشة للجسم 
فرشة للوجه ـ للبشرة الحساسة 
غسول للجسم - ٦٠ مل 
 غسول للوجه - للبشرة العادية/جافة - ٣٠ مل
غسول للوجه - للبشرة الحساسة - ٣٠ مل
غسول للوجه - للبشرة العادية - ٣٠ مل
الحين بتكلم عن انطباعي اول ٣ اسابيع الى شهر مع استخدامي للجهاز.
اول شي، وضع الجسم ما فادني ابداً. هو ميزة حلوة ليوم استرخاء و لمساج خفييف للجسم
 بس من ناحية التنظيف، ممكن استغني عنه واللي حابة تجرب الجهاز و مب محتاجة وضع الجسم تشتري الميا ولا الاريا.
في الصورة اللي تحت واضحة فرشة الجسم و هي حجمها اكبر من فرشة الوجه.


اما بالنسبة لوضع الوجة، صراحة وايد حيبته. 
 وتتقشر في كل مكان تقريبا. اول ما استخدمت الجهاز، بدت بشرتي تجف بشكل 
صراحة خفت بس استمريت لاني كنت قارية عن هالشي  
اهم شي الترطيب بعد الاستخدام على طول لان  بتحسين البشرة مشدودة!! 
استمريت عليها و حسيت ان الحبوب الصغيرة اللي تطلع عالجبهة و الخد خفت و الحساسية اللي عندي بعد خفت
بس هذا ممكن يكون بعد لان المنتجات اللي كنت استخدمها قبل خلصت و بديت استخدم منتجات غير اول ما استلمت الجهاز.
بس الحين عندي حبة كبيرة!!! 
يعني الجهاز ما بيخلي كل المشاكل تختفي من البشرة مرة وحدة ولا بيحل كل شي و خلاص.. لا.. 
الجهاز بينظف بطريقة احسن.. 
مرة كنت حاطة مكياج ثقيل لحفلة و بعد ما شلته بـ مزيل نيفيا و كلينزل زيتي نظفت بالجهاز انصدمت من الوصخ اللي طلع!



هذي تجربتي انا ويا الجهاز و مب شرط يصير لغيري مثل اللي صار لي بالضبط =)
 ان شاء الله ما نسيت اذكر شي و اللي عندها استفسار تكتبلي.. 

You May Also Like

2 comments