Review / Worth the hype? Too Faced Chocolate Bar Palette - Arabic | عربي

by - June 25, 2015

  السلام عليكم و رحمة الله و بركاته، 
صباح / مساء الخير،

بوست اليوم ريفيو، او بالأحرى تقييم سريع لو المنتج يستاهل الضجة اللي صايرة عليه، عن باليت متأكدة كلكم سامعين عنه.
الباليت هو باليت الجوكلت بار من تو فيسد.
كل حد يتكلم عنه و يمدحه، لكن عن نفسي ما حسيت ان الكلام اللي سمعته او قريته كامل صح فـ حبيت ابدي رايي الشخصي.

اللي متابعتني عن حسابي في الانستاقرام و تقرا الكلام اللي اكتبه بتعرف شكثر انا احب الشدوات، خصوصاً الشدوات اللي فيها شيمر او لمعة، و بعد احب الشدواات الدافية.
تكلمت عن هالباليت قبل و قلت انه ما يستاهل الضجة لكن قبل ما اكتب هالبوست جربته بطرق زيادة عشان ما اظلمه ولا اكتب شي غلط، و حسيت اني اقدر اخلي الشدوات تطلع حلوة على العين نفس ما هي حلوة فالباليت نفسه. 


اول شي بتكلم عن الدرجات المات و بعدين عن الشيمر و كيف استخدمهم. 
واايد حبيت كل الشدوات المات في البالت، خاصتاً Salted Caramel و Semi-Sweet لكسرة العين و White Chocolate تحت الحاجب. الاوان واضحة بالنسبة لغرضها و سهلة في الدمج و هذا اهم شي في الدرجات المات. 

عن نفسي، احس ان سهل نحصل شدوات مات حلوين، و انا محصلة درجات مات تناسبني لكسرة العين لكن الشدوات الشيمر صعب نحصل درجة مناسبة و جودتها اوكي. احس ان الشدوات الشيمر في هذا الباليت محتاجة شوية شغل فـ اكيد بتحصلون احسن منها. انا بكتب لكم طريقة اسويها تخلي الشدوات الشيمر حلوة و انتوا احكموا لو هذا الباليت يستاهل ولا لا.
الشدوات الشيمر: 
حسيت ان بعض الشدوات اللي فيهم قليتر نفس Gilded Ganache و Amaretto ناااااشفة، حتى الشدوات المات مب ناشفة! و يوم تنحط على العين القليتر يتناثر و يكون شكل الشدو على العين غريب شوي و مايل على اسود، كأنه القليتر هو اللي معطي لون للشدو. و بعد يوم تنحط على العين ما يكون شكلها مرتب، يعني مكان يكون اللون واضح و مكان لا. 
و في شدوات نفس Amaretto و Black Forest Truffle يوم احطها على عيني احسها مات، يكون شكلها flat يعني ما يعكس الضوء. 


الحل كان اني استخدم فرشة شعرها شوي خشن (بس ناعم على العين) يمسك الشدو زين نفس فرشة زوويفا اللي فالصورة رقمها 234. و عشان اخلي اللون متوحد و واضح على العين جربت ابلل الفرشة و واااايد حبيت النتيجة! 
الشدو البني اللي فيه قليتر Black Forest Truffle على العين يطلع يجنن! يطلع شوي ماروني على بني. 
و الشدو Amaretto على العين يبين نحاااسي دااافي فيه شوية وردي.
غريب ادري بس وايد حبيت النتيجة. انا احب الشدوات الدافية و الغريبة. 
بعد ما عطيتكم تجربتي، اترك الخيار لكم. لو انتوا جاهزين ان تشتغلون ويا الشدو لين ما توصلون للنتيجة اللي حابينه فـ خذوا هذا الباليت. اما لو تبون باليت هو من نفسه شدوااته حلوة و ما يحتاج شغل، هذا الباليت مب لكم. 

ان شاء الله قدرت افيد لو وحدة منكم، 

شكراً لمروركم 

You May Also Like

0 comments