ريڤيو: Makeup Forever AQUA MATIC - ARABIC

by - December 19, 2015

السلام عليكم و رحمة الله و بركاته، 
صباح/مساء الخير 

موضوع اليوم ريڤيو عن الشدوات الكريمية اليديدة من ميك اب فور افر اسمهم AQUA MATIC.
وصلوني درجتين من الشدواات من ميك اب فور افر - الخليج - من فترة بس كنت اجربهم عشان اكتب ريڤيو عادل..
* نفطة مهمة: صح ان مرات توصلني منتجات من شركات او تاجرات، بس احاول كثر ما اقدر اني اخلي كل اللي اكتبه عن المنتجات ١٠٠٪ كلام صدق. ميك اب فور افر ما طلبوا مني امدح منتجاتهم ولا حتى اتكلم عنهم.


شدوات الاكواماتك هي شدوات كريمية على شكل قلم. الشدواات ووتر بروف (مضادة للماي) و في منها ١٠ درجات بـ كذا فنش، منهم مات و منهم ساتن و منهم فيهم لمعة او قلتر.
مكتوب فـ الفايل اللي وصلني على الايميل من ميك اب فور افر ان الشدوات مضادة لماي البحر، لماي المسبح و ثباتها قوي ما تتأثر بالإحتكاك.

ارقام الدرجتيين اللي وصلوني واضحين فالصورة تحت. الوردي الفنش ماله ميتالك "فيه قلتر/لمعة" و الاسود مات "مطفي".
لان الشدواات ووتر بروف، ميك اب فور افر طرشوا لي وياهم سامبل من مزيل للمكياج الووتر بروف. وايد حبيته لان صدق يفيد و يشل المسكرا و الشدوات الكريمية بسرعة.

الاقلام هي من النوع اللي تنْلَف عشان ترتفع *ماعرف اشرح* يعني ما تحتاج برياة. هالشي حلو فيهم، خاصتاً للسفر، ما نحتاج ناخذ ويانا براية زيادة.
للي تحب اطراف الشدو تكون دقيقة عشان تستخدم القلم لأماكن صغيرة *مدمع العين مثلاً*، تحت كل قلم في براية تبري الجزء الكريمي بس من المنتج.

عن نفسي احس هذي الشدوات لهاً استدخدامات وايد. صح انها تنباع على اساس انها شدوات، بس اقدر استخدمهم كـ كحل او ايلانر برا و داخل العين.
القلم الوردي وااايد حلو داخل العين على خط الرموش السفلي، يوسع العين و حلو طلعات الصبح. الشدو فيه قلتر فـ ما انصح اي وحده تحطه داخل عينها خاصتاً اللي عينها حساسة. عن نفسي احس القلتر واايد ناعم فـ ما يضايقني.
حلو بعد على الجفن المتحرك كامل، ويا برونزر او بني فاتح على كسرة العين.

احب استخدم الشدو الاسود كـ ايلاينر على خط الرمش العلوي و بعد احب اسوي فيه ايلاينر الـ"كات آي". اخد منه شوي على فرشة ايلاينر نفس اللي فالصورة تحت و بعدين ارسم الايلاينر.
اللي عينها تدمع واايد يمكن ما يناسبها هذا داخل العين، ممكن انه يسيح. بس لآنه هو ووتر بروف و ثباته قوي فـ يتم علي طول اليوم لين ما اشله بنفسي.

للي عندها الشدو الاسود و محتارة شو ممكن تسوي فيه، تقدرين تستخدمينه كـ بيس لشدوات دوو كبروم او بقمنتس او حتى قلتر! الشدوات الدوو كروم معرفة انها تبين وااضحة و حلوة فوق بيس اسود. جربت القلتر الدوو كروم اللي فالصورة تحت (من انقلوت و رقمه ٧١) ويا الشدو الاسود و وااايد حبت النتيجة. طبعاً بللت الفرشة قبل ما استخدم البقمنت.
فـ العادة هذا القلتر لونه خفيف (لأنه قلتر، مب بقمنت قوي)، بس فوق الشدو الاسود طلع لونه ازرق واضح و تحت اضاءة غير يصير بنفسجي.

آخر شي، هذي اختصار تجربتي..
♥ الشدوات صدق ووتر بروف! جربت احكهم تحت الماي بس ما تحركوا.
♥ ثباتهم عالي يعني يحتاجون مزيل مكياج ووتر بروف ولا مزيل زيتي.
♥ وااايد كرييميين و سهلين فـ الدمج *اول ما ينحطون*.
♥ ينشفون بسرعة فـ لازم ادمج بسرعة، و اسوي عين و ادمجها بعدين اسوي العين الثانية.
♥ جربت احكهم على ايدي بدون ماي *بعد ما نشفوا بكم ثانية* و حسيت انهم تحركوا شوي بس ما احس ان قوة الحك اللي استخدمتها بتنحط على العين لانها منطقة حساسة. يعني هـ النقطة مب شرط شي سلبي بس حبيت انبهكم.

ان شاء الله قدرت افيدكم 


You May Also Like

0 comments