افضل منتجات "هاي اند" جربتها / لسنة 2015

by - December 22, 2015


السلام عليكم و رحمة الله و بركاته.. 
صباح / مساء الخير. 
اليوم بتكلم عن افضل منتجات جربتها شخصياً في سنة 2015، و بتكون كل المنتجات سعرها غالي شوي او تعتبر من الماركات المعروفة او غالية. 
مب شرط تكون هالمنتجات مناسبة لكل حد، بس شخصياً حبيتها و حسيت انها تستاهل.
HOURGLASS / AMBIENT EDIT PALETTE
اول منتج هو عبارة عن باليت فيه 6 منتحات حجم ميني من ماركة "أورقلاس".
هذي الماركة معروفة انها غالية و لهذا السبب قررت اشتري هذا الباليت. صح ان احجام البودرات فالباليت ميني، بس وايد مناسب للي حابة تجرب كذا شي من الماركة مرة وحدة. 
الباليت فيه 3 بودرات / اضاءات، بلشرين و برونزر. تكلمت عنهم قبل على انستاقرام بس بكرر على السريع.
ما حبيت الاضاءة اللي فالنص لأنها فيها قلتر واضح، اما باقي البودرات وايد حبيتهم.


MAKEUP FOREVER / EYESHADOWS
ثاني منتج هو بشكل عام شدوات من ماركة "ميك اب فور اڤر". 
الشدوات تنباع بشكل منفصل و سعر الشدو في حدود ال80 درهم. الحلو ان عندهم كل الدرجات، و نقدر نختار الشدوات اللي نباها و نسوي باليت متكون من شدويين ولا 3، ولا حتى ان نشتري باليت فاضي من ماركة ثانية و نحطهم فيه. 
بالنسبة لي احس ان السعر واايد مناسب لان حجم الشدو كبير، اكبر من حجم شدوات "ماك" و "ميك اب قيك". 
اكثر شي حبيته فيهم ان الوانها قوووية و واضحة، مثل الزبدة و سهلين في الاستخدام بدون مبالغة.
اللي تحب الشدوات تجربهم.


MAC / STROBE CREAM
ثالث منتج هو سترب كريم من "ماك". هذا الكريم بالنسبة لي يعتبر اضاءة سائلة و مرطب في نفس الوقت.
ينحط قبل الفاونديشن، يغني عن المرطب (للي بشرتها مختلطة/دهنية نفسي) و يعطي لمعة حلوة للبشرة تحت الفاونديشن. 
وااايد مناسب للي بشرتها جافة اكثر شي، بس يمكن تحتاج مرطب قبله او بعده.

BECCA / SHIMMERING SKIN PERFECTOR - PRESSED AND LIQUID
رابع و خامس منتجات هم من نفس الماركة. اثنينهم اضاءة من ماركة "بيكا" بس اللي على اليمين تركيبته سائلة واللي على اليسار تركيبته بودرة.
اللي فالصورة على اليمين هذي الحجم الميني، كانوا مجموعة ميني للأعياد السنة اللي طافت، بس الماركة تسوي نفس التركيبة بحجم اكبر و ينباعون منفصلين، و يسوون مجموعات لمتد بين فترة و فترة للي حابة تجرب الحجم الميني اول. 

حبيت التركيبة السائلة لانهم مافيهم قليتر واضح ابداً. لما يندمجون على البشرة يعطون لمعة حلوة و يعكسون الاضاءة بس وااايد ناعمين و مناسبين لطلعات الصبح. ينحطون تحت الفاونديشن ولا فوقه، ولا حتى ينخلطون ويا الفاونديشن.
الدرجات اللي فالصورة - من فوق لين تحت هم: 
PEARL - OPAL - CHAMPAGNE GOLD

اما عن التركيبة البودرة، صح ان فيها قلتر اثقل بس بعد اخف عن باقي الاضاءات. ملمس الاضاءة مثل الزبدة، وايد ناعمة و اللون واضح.
نسيت اصور شكل البودرة و لونها من داخل، بس درجتها CHAMPAGNE POP و هالدرجة لمتد. 
لون الدرجة وااااايد حلوه، لونها مثل اسمها، شامبين على ذهبي على بطيخي او PEACHY.
الدرجة شوي مشابهه لاضاءة "ماك" SOFT AND GENTLE، بس اضاءة "ماك" فيها قلتر اكثر و لونها مايل على وردي او فضي اكثر من ذهبي.

خلوا في بالكم ان هذي الدرجات لونها ممكن يتغير شوي على حسب لون البشرة اللي ينحطون عليه، و ممكن ان وصفي ما يكون 100٪ مطابق، بس تقدرون تدورون صور مقارنة للاضاءات.


MAC / SOFT AND GENTLE
 سادس منتج هو اضاءة "ماك" المشهورة سوفت اند جنتل. واااايد سمعت عليها مدح و كل ما ادخل ماك اغير رايي و ما اشتريها. اخر شي قررت اخذها يوم كنت مسافرة و ما ندمت ابداً. 
صح اني ذكرت ان فيها قلتر خفيف بس وااايد حلوة! خاصتاً لما تنحط بفرشة صغيرة، النتيجة تطلع واااايد احلى من لما تنحط بـ فان برش. القلتر يخف مع الدمج، بس اللي مب متعودة على الاضاءات ما تكثر منها الصبح و تخليها للمناسبات و طلعات المسا احسن.

MAC / MATTE AND SATIN LIPSTICKS
اخر منتج هو ارواج "ماك" الساتن و المات بشكل عام. ارواج ماك واايد يحبونها و يمدحونها بس هالسنة اكتشفت ان اكثر فنش ناسبني هو الساتن و المات. 
ارواجهم سهلين في الاستخدام، ما ينشفون الشفايف و حلوين للمناسبات او الطلعات السريعة. شي واحد ماحبه فيهم ان اللون مب دايماً ثابت بس هذا شي عادي في الارواج الستيك. 

و هذي كل المنتجات ال"هاي اند" اللي احس انها تستاهل كل فلس يندفع عليها.
كل المنتجات اللي ذكرتها في هالبوست جزء من مفضلاتي لسنة 2015.. البوست بينزل على نهاية السنة.

شكراً على مروركم 


You May Also Like

1 comments