ريڤيو + تجربتي: فاونديشن Makeup Forever Ultra HD - STICK

by - March 29, 2016

السلام عليكم و رحمة الله و بركاته

هذا البوست هو عن تجربتي لـ فاونديشن ميك اب فور اڤر الترا اج دي الـ"ستيك". 
الفاونديشن عندي من شهر ١١ بس خذت كل هالوقت عشان اكتب الريڤيو لأني كنت حابة اكتب رايي و تجربتي بالتفصيل و اكون متأكدة من كل شي اكتبه.

اول ما سمعت عن الفاونديشن على يوتيوب، و ان الـ"ستيك" تعطي فنش طبيعي مايل على دويي "dewy"، حطيت في بالي اني باخذ الفاونديشن اول ما ينزل عندنا. لـ هالسبب نهاية شهر ١١، اخترته  كـ جزء من هدية يوم ميلادي من اهلي. بعدها بفترة وصلتني درجتين من ميك اب فور اڤر، درجة للكونتور و درجة للهايلايت.

قبل ما ابدأ بالريڤيو، لازم اذكر اني اساساً كنت حاطة في بالي اني بحب الفاوندشن لان اول ما حطيته على ويهي حبيييت النتيجة و وااايد بهرني! شكله flawless بصراحة.
صح اني كنت ابى احب الفاونديشن اساساً، بس هالشي ما أثر على الريڤيو ابداً لاني بذكر كل التفاصيل و النقاط السلبية و الايجابية، و اتمنى انها تفيدكم.


بخبركم اول شي عن نوع بشرتي و شو الاشياء اللي احب انها تكون في الفاونديشن، عشان الريڤيو يكون واضح اكثر.

عن بشرتي:

نوع بشرتي مختلطة حساسة. التي زون عندي بسرعة تدهن خاصتاً في الصيف. اما منطقة الخد و الفك حساسة اكثر شي و مايلة للجفاف.
لما تطلع لي حبوب و تبدأ تخف، الجلد حوالينها يبدا يتقشر و اكثر الفاونديشنز اللي استخدمهم يبرزون هذي التقشرات. لـهذا السبب احب الفاونديشنز اللي تميل للفنش الطبيعي اكثر من المات.

اللي احبه فالـفاونديشنـز:

  • مثل ما ذكرت قبل، وايد احب الفاونديشنز الدويي او طبيعية.
  • ما امانع ان يكون شكل الفاونديشن glowy بشرط ان الفاونديشن يتم على ويهي و ما يتحرك.
  • ما احب الفاونديشن الرطب ولا شكله كيكي و اوڤر، احب انه يكون خفيف و طبيعي. اعرف بنات يحبون ان يكون شكل الفاونديشن واضح بس انا لا.



درجتي و انطباعي الاول:

  • الفاونديشن خذته من سيفورا، و خليت الموظفة تختار الدرجات القريبة من لون بشرتي، و بعدين اخترت وحدة منهم. الدرجة اللي خذتها 123=Y365 وايد ناسبتني الحمدلله. الدرجات اللي وصلوني من ميك اب فور اڤر هم: 117=Y225 للهايلايت -- 177=Y505 للكونتور
  • في الموقع كاتبين ان الفاونديشن يعطي فنش طبيعي ساتن و مناسب لكل انواع البشرات، حتى البشرة الجافة. من خلال تجربتي، حسيت ان لو البشرة فيها جفاف او تقشرات، الفاونديشن يبرزها.. يعني كل البشرات من الجافة للدهنية لازم تكون مترطبة زين عشان الفاونديشن يكون شكله حلو.
  • بعد حسيت ان الفاونديشن ممكن يبرز المسام الواسعة و الحبوب المرتفعة، يعني للمناسبات المهمة، انصح ان تستخدمون اي برايمر تحبونه قبل عشان تخففون من مظهر الحبوب و المسام. ممكن البودرة تساعد، بس شخصيا ما استخدمت بودرة وايد ويا هذا الفونديشن و بذكر تحت ليش.
  • من بعد شكل الفاونديشن على البشرة، اكثر شي حبيته فيه انه بعد كم دقيقة ينشف او يثبت على البشرة، يعني ما يتم رطب. لهذا السبب ما حسيت اني محتاجة اني اثبته بـ بودة، خاصتاً خلال الاشهر الباردة / فالليل. اللي تحب تثبت الفاونديشن ببودرة تقدر، لان شكله يتم طبيعي و حلو.
  • فالاخير، برد اعيد ان شكل الفاونديشن على البشرة يجنن! يخلي الويه فلولس خصوصاً لما البشرة تكون صافية او شبه صافية. صح يطلع شكله احلى على البشرة اللي ما فيها عيوب وايد، بس ممكن اي وحدة تستخدمه مع البرايمر + الكونسيلر + البودر + الاستخدام الصح.
  • الفاونديشن يعطي تغطية ميديم الى فل، و يندمج بسهولة. بذكر لكم طريقتي فالاستعمال/دمج تحت.


سلبيات الفاونديشن:

ذكرت قبل اني حبيت الفاونديشن على البشرة، فـ ممكن تتسائلون شو اللي خلاني اطول في كتابة هذا البوست.
 جربت الفاونديشن ٣-٤ مرات، و في كل تجربة استخدمته اكثر من مرة خلال الاسبوع عشان اجوف تأثيره على بشرتي. اول تجربتين استخدمت فيهم الفاونديشن اكثر من يوم في الاسبوع طلع لي حبوب! الحبوب كانت حمرا و صغيرة على الخد و الجبهه. شكل الحبوب كان غريب فـ عرفت اني تحسست من منتج كنت استخدمه، فـ بديت اوقف استخدام كم منتج عندي عشان اعرف اي واحد. فالنهاية عرفت انه الفاونديشن اللي طلع لي حبوب.

كلمت كم بلوقر استخدوا الفاونديشن عشان اعرف تجربتهم، و لو صار لهم نفس الشي.. منهم قالوا انه بعد طلع لهم حبوب، و منهم نبهوني ان الفاونديشن ثقيل و ممكن يكتم البشرة لو تم عليها لـ فترة طويلة.

الحل:

آخر تجربة، خذت نصيحة البلوقرز و استخدمت الفاونديشن ٦ من ٧ ايام فالاسبوع مع روتين تنظيف احسن، و حبيت النتيجة. الحمدلله ما طلعت لي الحبوب مرة ثانية.
انا عندي الكلاريسونك من فترة و تكلمت عنها وايد، استخدمها كل يوم تقريباً بس خلال اول تجربتين للفاونديشن ما استخدمتها وايد. اعترف اني كنت كسولة لاني كنت ارجع البيت متأخر فـ انظف بشرتي على السريع من التعب.
لاكن خلال اخر تجربة استخدمتها كل يوم و الحمدلله بشرتي ما تحسست و شكلها احسن حتى.
منتج ثاني حسيت ممكن انه فادني هو تونر ورقة الشاي من لش.



اخر نقاط بذكرها بتكون عن طريقتي فالاستعمال و ثبات الفاونديشن.



طريقة الاستعمال:

بما ان الفاونديشن يندمج بسرعة و بكل سهولة، حبيت النتيجة سواءً دمجته بالـ بيوتي بلندر ولا فرشة kabuki. اخر فترة تجربة استخدمت فرشة زوييڤا اللي فالصورة فوق ( رقمها ١٠٣) و وايد حبيتها لأنها تدمج الفاونديشن زين بس ما تخفف من الغطية. مشكلتها الوحيدة انها تمتص الفاونديشن و هذا الشي واضح في الصورة فوق.



نصيحتي ان ما تستخدمون وايد من الفاونديشن على طول. مسحة وحدة على كلٍ من هالمناطق كافية لأول طبقة: الجبهة، الخشم، الذقن و الخدين. اللي محتاجة تغطية اكثر ممكن تزيد بعدين.


مدة الثبات:

على بشرتي المختلطة، الفاونديشن يبدأ يدهن خلال ساعة او ساعتين. هذا الشي عادي عندي بشرط ان الفاونديشن ما يكون شكله وااااايد مدهن ولا يبدأ يسيح.

الحلو فيه انه يدوم علي لمدة ٥-٧ ساعات او اكثر، بس الفاونديشن مب transfer proof يعني ممكن يطبع على الملابس او الشيلة.

هذي تجربتي و ثباته علي، بس اكيد النتيجة تتغير من بشرة لـ بشرة.

بإختصار...
حبيت الفاونديشن و شكله على البشرة، حلو على الطبيعة و في الصور.
اللي مستعدة انها تهتم بـبشرتها و تهيئها للمكياج و تنظفها زين بعد المكياج، الفاونديشن بيناسبها.

انصح فيه اكثر للي بشرتها مافيها وايد عيوب. الفاونديشن يغطي الاثار و التصبغات و الاحمرار، بس مثل اي فاونديشن، ممكن يبرز التقشرات ولا الحبوب المرتفعة.

ان شاء الله يكون الريڤيو فادكم. 

You May Also Like

0 comments