باليتـات الكونـتور | كات ڤون دي، انستازيا، ميك اب فور اڤر

by - May 27, 2016



السلام عليكم و رحمة الله و بركاته،

     في الفترة الأخيرة وايد وصلتني اسئلة و طلبات اني اكتب رايي عن كذا بالت لمنتجـات الويه. اخيراً فضيت و قررت اني اسوي بوست مخصص حق باليتات الكونتور و الهايلايت اللي عندي. 
     واضح في الصور اللي تحت اني استخدمت واحد من الباليتات بشكل متواصل لأنه كان عندي من اكثر من سنة و هو بالت الكونتور البودرة الوحيد عندي للحين. الباليتات الثانية في هذا البوست تقريباً يديدة عندي فالكولكشن.


 قبل ما ابدأ بالريڤيوز، في كذا نقطة حابة اذكرها...
  • بعض الدرجات في الصور واضح اني ما استخدمتها وايد و هذا لاني مصورة الصور قبل فترة فـ استخدمت الدرجات اكثر بعدها عشان اكتب هذا البوست.
  • كل الصور في هذا البوست معدلة عشان تكون اوضح. الدرجات في الصور مبينة افتح من ما هي على الطبيعة.
  • للي تبى تقارن الدرجات اللي تناسبها بـدرجتي، انا اعتبر نيوترل لايت-ميديم، و اكون اكثر على صوب الميديم. للأسف ما اعرف درجتي في ماك، بس حالياً درجة ميك اب فور اڤر الــستك فاونديشن 123=Y365 هي الانسب لي.

في نقطة مهمة بعد لها علاقة بالهايلاتنق لازم اوضحها لأن وايد بنات ما يميزون بين طرق الهايلات او منتجات الهايلايت. الهايلايت نوعين و هم: 
  1. استخدام لون افتح من لون البشرة او لون الفاونديشن عشان ينور المنطقة. في هذي الطريقة ممكن يكون المنتج كريمي او مات، و ينحط على مناطق الويه منها: نص الجبهه، عظمة الانف/الخشم، عظمة الحاجب، تحت العين و الذقن. في هذي الطريقة احب اسمي المنتج "درجة الهايلايت" او highlight.
  2. استخدام درجة فيها شمر او لمعة عشان تعكس الاضاءة و تجذب الانتباه للمنطقة. ممكن يكون المنتج ساتن او شمر، و ينحط على اي منطقة عالية على الويه منها المناطق اللي ذكرتها قبل بالاضافة الى عظمة الخد و الشفايف و مدمع العين. في هذي الطريقة احب اسمي المنتج "اضاءة" او "هايلايتر" او illuminator.
الحين اقدر ابدأ بالريڤيوز... ببدأ بأول بالت كان عندي لأيدد واحد في الكولكشن.

Kat Von D | Shade and Light palette

     
     واضح من الصورة اني وايد استخدمت هذا البالت، خاصتاً درجات الهايلايت و افتح درجتين للكونتور.
     وايد بنات حسوا ان غير درجة البنانا في الوسط، بودرات الهايلات ما لها داعي او ما لها استخدام مع لون بشرتهم. بالنسبة لي، احب اخلط بين الدرجات عشان اثبت الكونسيلر و انور منطقة تحت العين بـ اسفنجة ناشفة. هالطريقة نفعتني بس ويا الكونسيلرز اللي ما يخططون وايد علي و اللي هم خلطة بين كونسيل ميبليين فت مي و كونسيلر ال ايه قيرل.
     اما بالنسبة لدرجات الكونتور، اسفتدت بس من افتح درجتين لبشرتي و بعد على بشرات اهلي. احس البالت وايد مفيد للـ ميكب ارتست لأن فيه تنوع في الدرجات، بس ما احسه مناسب للبشرات الفاتحة وايد. الحلو في البالت ان البودرات وايد ناعمة على البشرة و تبين طبيعية، مع إن ملمسها وايد ناعم و تتناثر بسرعة. درجات الكونتور تناسب استخدام يومي او للمناسبات، و هذا الشي يعتمد على الكمية اللي تنحط على البشرة.
     وايد بنات قالوا ان البودرات ما تثبت وايد، و هذا الشي طبيعي بالنسبة لي. صح ان الكونتور يخف مع الوقت، بس اللون يدوم بين ٤ و ٦ ساعات تقريباً.

Anastasia Beverly Hills | Cream Contour Kit in Light


     اول ما صار عندي هذا البالت ما توقعت اني احبه لأن كذا مرة جربت الكونتور الكريمي و كان شكله كيكي و ثقيل علي، لكن بعد ما جربت هذا البالت غيرت رايي. 
     المنتجات او الكريمات اللي في هذا البالت قوامها ثقيل شوي بس كريمية و ممكن تندمج بسهولة قبل ما تنشف و تثبت لـ ملمس باودر. درجات الكونتر لا هي دافية ولا هي رمادية، لونها مناسب وايد للكونتور بشرط ان ما نكثر منها. احب اوزعها بصبعي، احط مسحة وحده بس تحت كل عظمة خذ، و بعدين ادمجة بفرشة شعرها صناعي مثل فرشة ريل تكنيك Real Techniques Expert Face او فرشة دوو فايبر صغيرة. اما للمناطق الثانية للحين احب استخدم كونتور باودر.
     الحلو في درجات الهايلايت في هذا البالت انها تنفع لتحت العين و للمناطق الثانية في الويه. صح ان الكريمات تنشف لملمس باودر، بس ما تنشف بسرعة فـ هذا الشي يعطيني وقت كفاية اني اوزعها و ادمجها. تحت عيني احب احط مسحة ولا مسحتين من الهايلات و بعدين احط الكونسلر و ادمجهم مع بعض بـ إسفنجة مبللة. للمناطق الثانية، استخدم الهايلات بروحة خاصتاً لو الفاونديشن ما كان فاتح.
     نصيحتي للي تفكر تاخذ هذا البالت ان تاخذ درجة افتح من لون بشرتها، يعني اللي بشرتها ميديم نفسي تفكر فالبالت الـ لايت اول. صح ان درجات الهايلايت شوي فاتحة علي، بس درجات الكونتور لونها وايد مناسب و وحدة منهم غامقة على بشرتي فـ لو خذت البالت الميديم ممكن درجات الكونتور ما تناسبني.

Makeup Forever | Pro Sculpt palette in 30


     هذا البالت من ميك اب فور اڤر فيه ٤ درجات كريمية: هايلات، كونتور، اضاءة و بلشر. الدرجات او المنتجات كلها كريمية بس ملمسها يتحول لـ باودر. مقارنةً بـ بالت انستازيا، المنتجات في هذا البالت كريمية اكثر و تتوزع بشكل اسرع و اسهل، بس تثبت اسرع. لهذا السبب ما حبيت درجة الهايلايت تحت العين لان حسيتها ناشفة. اما بالنسبة لدرجات الكونتور و البلشر وايد حبيتهم لان لونهم واضج و يتوزعون بسهولة، و ممكن اني ازيد على اللون لو احتجت.
     بعكس بالت انستازيا، اقدر اوزع المنتجات من هذا البالت بـ الفرشة على طول و احب استخدم وياهم فرشة دوو فايبر نفس اللي في الصورة. نقطة لازم اذكرها ان درجة الكونتور في هذا البالت (رقمه ٣٠) دافية اكثر من درجات الكونتور في الباليتين اللي ذكرتهم قبل، و لهذا السبب ما انصح ان تكثرون منه عشان ما يقلب برتقالي. 
     جربت الكونتور و البلشر و الاضاءة كذا مرة مع بعض و حسيت ان البلشر خَف اسرع من الكونتور. البلشر دام بين ساعتين الى ٤ ساعات بس الكونتور دام لين ٦ ساعات تقريباً.. يمكن لأني ثبته بـ كونتور بودرة. في النهاية احس ان البالت وايد عملي لإستخدام يومي لان المنتجات كريمية و ثباتها مناسب لطلعات سريعة.

     
     هذا كل اللي اقدر اقوله عن الباليتات حالياً و اتمنى اني ما نسيت اذكر نقطة مهمة. اللي عندها اي استفسار عن المنتجات تكتب لي كومنت و ان شاء الله برد عليها.

You May Also Like

0 comments