المنتجات اليديدة عندي و انطباعي الاول عنها

by - June 07, 2016


السلام عليكم و رحمة الله و بركاته،
مبارك عليكم شهر رمضان، تقبل الله منا و منكم صالح الأعمال

     خلال الفترة الأخيرة كنت احاول اركز على المنتجات اللي عندي عشان اجربها و اكتب عنها او اخلصها، بس اكيد ما قدرت امنع نفسي من اني اخذ كذا منتج يديد عشان اجربه. كل المنتجات اللي في هذا البوت خذتهم بروحي بس اول اثنين بتكلم عنهم وصلوني من شركات.

يلا نبدأ بالمنتجات...

Clarins | Mascara supra volume

     هذي المسكرا كتبت عنها على انستاقرام اول ما وصلتني. فالباكج اللي وصلني مكتوب انها تزيد من كثافة الرموش الطبيعية بـنسبة ١٧.٦٪ خلال ٤ اسابيع. اول ما وصلتني بديت استخدمها و صراحة ما حسيت بـ أي فرق في رموشي الطبيعية بس بعد احب المسكرا. تركيبتها رطبة شوي بس ما تخيس الجفن او تنطبع عليه. اللي احبه فيها انها وايد مناسبة للإستخدام اليومي لانها تعطي طول خفيف مو دراماتك لـرموشي. احب احطها من جذور الرومش للأطراف بدل ما احركها من اليمين لليسار. لو حركتها من اليمين لليسار او العكس احس انها تكتل الرموش و شخصياً ما احب هذا الشي.

Makeup Forever | Aqua XL eye pencils
الدرجات من فوق لين تحت:
M-16
M-26
M-10
الدرجات من فوق لين تحت:
M-40
M-30
M-60
     هذي من ايدد منتجات ميك اب فور اڤر للعين. وصلوني ٦ درجات بس اخترت ٣ منهم عشان اجربهم اول. كالعادة، انبهرت بـتركيبة الاقلام. الاقلام واايد وااايد كريمية بس تنشف و تـثبت و تستوي ووتر بروف (مضادة للماي).
هذي اهم النقاط اللي حبيت اني اذكرها بعد تجربتي...

     كالعادة، يوم استخدم درجة غامقة داخل العين (خط الرمش العُلوي) لازم اتريا لين الايلاينر يثبت و ينشف عشان ما ينطبع على خط الرموش السُفلي. اما بالنسبة للدرجات الفاتحة مثل الاصفر، لازم دايماً احط كذا مسحة من الايلاينر عشان يطلع اللون مثل ما اباه داخل العين. غير عن هذا، الاقلام تجنن و صدق تثبت لفترة طويلة.

Benefit Cosmetics | Matte Rescue

     هذا برايمر يديد من بنفت و هو اصراد ثاني للـبرايمر المعروف بورفشنل. بورفشنل يستخدم عشان يملي المسام و الخطوط التعبيرية. عندي منه كذا سمابل و بصراحة ما حسيت انه يغير شكل الميكب علي فـ ما افكر اشتري الفل سايز منه. اما هذا، اول ما سمعت عنه حطيته في لستتي لان فكرته انه يخلي البشرة مات. شخصياً احب الميكب الدويي او الطبيعي اكثر من المات بس بشرتي مختلطة فـ احتاج برايمرات مات للتي زون. برايمر البورفشنل ملمسه مثل السيليكون، اما هذا تركيبته جل و لونه ازرق شفاف بس طبعاً اللون ما يبين على البشرة.

     حالياً قاعدة اعالج بشرتي من الحبوب الصغيرة اللي تكون بارزة تحت الشمس و العلاج مخلي بشرتي جافة و متقشرة فـ للأسف ما قدرت اجرب هذا البرايمر كفاية عشان اكتب رايي عنه. بكتب عنه اول ما احس ان بشرتي صارت طبيعية مرة ثانية.

خذته من سيفورا بس ما اذكر السعر.

Anastasia | Liquid lipsticks
الدرجات: Dusty Rose (يسار) و Crush (يمين) 
     من فترة طويلة كان ودي اني اجرب ارواج انستازيا السائلة بس للأسف ما حبيت الدرجات النيود اللي كانت متوفرة، بس في الفترة الأخيرة انستازيا نزلت كولكشن تقريباً كله ارواج نيود وايد تحمست له. للأسف حسيت اكثر الدرجات اللي حبيتها فاتحة علي لان شفايفي شوي غامقة فـ اخترت اغمق درجة حبيتها اسمها Crush. الدرجة طلعت شوي فاتحة بس مع محدد تطلع بيرفكت. انستازيا بعد سوت ريستوك للدرجة المعروفة Dusty Rose فـ على طول خذتها.

     وايد حبيت تركيبه الارواج.. تركيبتهم شوي ثقيلة و لونهم وااضح من اول مسحة. اللي ما حبيته هي مدة الثبات. حتى بدون ما اكل او اشرب الارواج بهتت و انمسحت من على شفايفي في خلال ٢-٣ ساعات.

طلبتهم من تاجرة على انستاقرام و سعر الروج ١٢٠ درهم.

Laura Mercier | Shimmer Bloc

الدرجة: Peach Mosaic
     لورا ميرسييه من الماركات اللي من زمان خاطري اجربها، و اخيراً قررت ابدا الكولكشن بـمحدد شفايف و هايلايتر، و لو حبيتهم اكيد باخذ اكثر. الماركة متوفرة عندنا في دبنهامز و المحلات اللي توفر ماركات هاي اند مثل تريانو في ياس مول. جربت الـ٣ درجات المتوفرة في تريانو للهايلاتر و قررت اخذ الدرجة المشمشية بس ابداً ما تبين مشمشية على البشرة.

    الحلو في الهايلايتر انه فيه ٤ درجات مختلفة تقدرون تخلطون بينهم ولا تستخدمون كل درجة بروحها و تقدرون تستخدمون الدرجات كـ هايلاتر ولا فوق البلشر ولا حتى كـ ايشدو على حسب الدرجة و لون بشرتكم. البودرات مو كريمية وايد وااايد (مقارنةً بـ هايلاترات بيكا) بس ابداً ما تعتبر ناشفة، يعني ملمسها وايد مناسب و الألوان وايد واضحة بدون مبالغة و مافيها قلتر كبير او واضح.

خذته من محل تريانو في ياس مول و سعره ١٩٠ درهم.

Laura Mercier | Lipliner

الدرجة: Hazelnut Tea
     من بين كل المحددات النيود اللي جربتها في المحل، هذي الدرجة اللي شدتني اكثر شي لان ما عندي شي مشابه لها. الدرجة نيود بني فاتح بس ما فيها وردي ابداً. ماعرف اوصف الدرجة بس وايد وايد حلوة.

     تركيبة المحدد بعد حسيتها فريدة من نوعها. المحدد ما يعتبر كريمي بس بعد ما يعتبر ناشف.. ملمسة واكسي اكثر بس ينرسم بـسهولة على الشفايف لكن يسحب الشفايف شوي. اللي تحب انها تحك شفايفها في بعض بعد ما تحط المحدد عشان يستوي متساوي ما بتقدر تسوي هذا الشي ويا هذا المحدد الا لو استخدمت مرطب قبل او بعد المحدد. 

     الحلو في المحدد بعد انه ينباع ويا براية في البوكس. انا ما اكتشفت هذا الشي الا بعد ٣ ايام يوم كنت بعق البوكس. 

خذته من تريانو في ياس مول و سعره ١٠٤ دراهم مع البراية.

Laura Mercier | Tinted moisturizer SPF 20
الدرجة: Nude

     الموظفة اللي كانت تساعدني في المحل عطتني سامبل للـ تنتر موستايزر من لورا ميرسييه فيه حماية شمس بنسبة ٢٠. الدرجة اللي عطتني ايها شوووي فاتحة بس الاندرتون وايد مناسب.


    الحلو في هذا المنتج انه خفيف على البشرة و تغطيته خفيفة مناسبة لإستخدام  يومي و الفنش طبيعي يعني مو مات ولا ديويي. لأن الفنش طبيعي وايد ساعد ويا التقشرات اللي على ويهي في انه ما يبرز شكلها، بس نصيحتي للي بشرتها جافة و تتقشر لازم لازم ترطب قبله حتى لو هذا يعتبر مرطب.

The Body Shop | Camomile cleansing oil

     هذا اخر منتج في هذا البوست و هو الوحيد اللي ما يعتبر منتج يديد بالنسبة لي. كان عندي من فترة بس ما كنت اعرف كيف استخدمه، و لين ما تعلمت كيف استخدمه كنت مخلصه نصه. اخيراً قررت اني اخذ غيره لانه وايد سهل في ازالة الميكب. طريقتي في استخدامه اني احط شوي على ايدي و بعدين اوزعه على ويهي واسويله مساج، و بعدين شوي شوي احط ماي لين ما يتحول الزيت لـ تركيبة مثل الحليب او الماي، بعدين امسحه بـ فوطة للويه او قطن (احب استخدم فوطة الـ ميكب اريزر) و اخر شي اغسل ويهي مرة ثانية عشان اتأكد انه نظيف.

    الحلو في هذا الزيت انه ما يخلي ملمس زيتي على الويه، بالعكس احس اني ما احتاج غسول بعده الا لو كنت بنام بعدها لأني لازم اتأكد ان بشرتي نظيفة. مناسب حتى للميكب المضاد للماي بس يحتاج مساج اكثر.

نسيت سعره بس كان بين الـ ٦٠ و ٨٠ درهم.


هذا كل اللي اقدر اقوله عن المنتجات حالياً. 
اللي عندها اي استفسار تكتبه في الكومنتس. 


You May Also Like

0 comments