ريڤيو: الكوشن فاونديشن من ماك | MAC Matchmaster Shade Intelligence Compact

by - June 27, 2016




السلام عليكم و رحمة الله و بركاته 

موضوع اليوم بيكون ريڤيو عن تجربتي لـ واحد من منتجات ماك الجديدة في الميكب واللي هو الكوشن فاونديشن.

قبل ما ابدأ البوست حبيت اني اذكر اني من اليوم بحاول كثر ما اقدر اني اقلل استخدامي للكلمات العامية الاماراتية او الخليجية او اسبدال الجيم "ج" بالياء "ي" في بعض الكلمات عشان الكلام يكون اوضح و مفهوم اكثر للبنات من الدول العربية غير الخليج.

الحين نبدأ بالريڤيو، بس اول بخبركم عن المنتج..

عن الفاونديشن

منتجات الكوشن "cushion" معروف انها الهبة الجديدة في عالم الميكب.. في منها فاونديشن و بلشر و برونزر و غيرها.
 في شهر ٥ ماك نزلوا الكوشن فاونديشن الخاص فيهم اسمه  
 MATCHMASTER SHADE INTELLIGENCE COMPACT و متوفر منه ١٢ درجة اللي هم: 1.0 - 1.5 - 2.0 - 3.0 - 4.0 - 5.0 - 6.0 - 7.0 - 7.5 - 8.0 - 8.5 - 9.0

وصلتني درجة 5.0 بس حسيتها شوي برتقالية على بشرتي اللي تعتبر بين النيوترل و بين البشرة الزيتية بس مع الدمج و استخدام كونسيلر افتح طلع شكل الفاونديشن مناسب او مقبول.

نوع بشرتي

قبل ما ابدأ كل ريڤيو من هذا النوع احب اذكر نوع بشرتي و الصفات اللي احب انها تكون فالمنتج عشان كل بنت تعرف تقارن توقعاتها من المنتج بـ توقعاتي.
بشتري بالعادة مختلطة: التي زون عندي دهنية و تدهن بسسسرعة يعني بعد كم ساعة بعد ما اغسلها، اما المناطق الثانية فـهي عادية الى جافة حساسة. حالياً اعالج بشرتي فـ نوع للبشرة متغير شوي.. بشرتي في هذي الفترة و في الفترة اللي حربت فيها الفاونديشة جافة و متقشرة وايد.
صح ان بشرتي بالعادة مختلطة، بس وايد احب الميكب او الفاوندشين الدوي يعني اللي فيه لمعة طبيعية و صحية بس بدون قلتر واضح طبعاً. للأسف للحين ما حصلت برايمر للتي زون الدهنية عشان يقلل من افراز الدهون خلال اليوم فـ لازم بعد كل ساعة امسح الدهون بنفسي.

الحين ببدأ بالريڤيو...

طريقة الاستعمال

مثل اي كوشن فاونديشن، الفاونديشن يكون وياه اسفنجة تُستخدم لـ توزيع و دمج الفاونديشن على البشرة بس ممكن ان الفاونديشن يُستخدم بـ اي طريقة للتوزيع يعني فرشة ولا اسفنجة مبللة ولا غيرها. انا جربت الفاونديشن ويا فرشة كابوكي، فرشة ستبلنق "stippling"، اسفنجة مبللة و الاسفنجة اللي كانت ويا الفاونديشن. من تجربتي حسيت ان الفرش او الاسفنجة المبللة تدمج الفاونديشن اسرع و عملية اكثر للإستخدام. طريقة الدمج بعد تأثر على التغطية.. استخدام حركة الطبطبة ويا الفرش ولا الاسفنجات تعطي تغطية اكثر من الدمج بـحركة دائرية. اللي بشرتها جافة او عندها تقشرات انصحها تستخدم  طريقة الطبطبة عشان ما تبرز التقشرات اكثر، و يُفضل تستخدم اسفنجة مبللة عشان تزيد نسبة الترطيب.

الفنش و مدة الثبات

بكل صراحة، انبهرت بالفنش للفاونديشن. عادتاً الكوشن فاونديشن تعطي منظر رطب و فنش دويي للبشرة بس هذا الفاونديشن الفنش ماله طبيعي الى شبه مات بس ما يعطي البشرة احساس الجفاف و ما ينشفها. اللي حبيته فالفاونديشن ان بعد الدمج ينشف و يثبت يعني ما احس ان في طبقة رطبة على البشرة خصوصاً لما اطلع برا الصبح في الحر او الرطوبة. خلوا في بالكم ان ممكن الفنش الشبه مات على بشرتي يكون بسبب جفافها في هذي الفترة. تغطية الفاونديشن حالياً تدوم على بشرتي الى ٦ او ٧ ساعات بس التي زون تبدأ تدهن بعد ٤ ساعات.

شكل الفاونديشن على البشرة

من تجربتي حسيت ان الفاونديشن ما زادت من شكل التقشرات في بشرتي بس بعد ما حطيت بودرة حسيت ان في مناطق جافة برزت. نصيتحتي للي عندها مناطقة جافة او متقشرة انها ترطب زين قبل الفاونديشن و تستخدم مست او بخاخ للبشرة بعد البودرة عشان تخفف من شكل البودرة و يُفضل تستخدم اسفنجة مبللة مثل البيوتي بلندر. بالنسبة للمسام، الفاونديشن ما زاد من شكلها بس بعد ما اخفتها فاللي عندها برايمر او منتج يخفف من شكل المسام و تحبه، تستخدمه ويا هذا الفاونديشن. الفاونديشن وايد خفيف على البشرة و ما يستوي شكله كيكي ولا يبرز الخطوط التعبيرية ابداً.
شخصياً انصح فيه للي بشرتها عادية الى مختلطة بس اللي عندها مناطق تدهن بسرعة ممكن تستخدم اي برايمر يناسبهما عشان يخفف من افراز الدهون و اللي عندها مناطق جافة ترطب بشرتها زين.

اختصار الريفيو
  • توزيعه و دمجه وايد سهل و ممكن تستخدمون اي طريقة تناسبكم. 
  • الكفرج لايت الى ميديم و تعتمد على طريقة التوزيع و الدمج، بس الكفرج ما توصل الى فل كفر.
  • ما يبرز مشاكل البشرة مثل المسام و التقشرات بس بعد ما يخفيها.
  • ملمسه و شكله خفيف قريب من شكل البشرة.
  • يدوم الى ٦-٧ ساعات بس المناطق الدهنية تدهن بعد ٤ ساعات تقريباً.
  • ما طلعلي حبوب او سبب لي حساسية.

هذا كل اللي اقدر اقوله عن الفاونديشن حالياً. بغض النظر عن لون الدرجة على بشرتي، حبيت الفاونديشن و احسه مناسب لإستخدام يومي حق توحيد لون البشرة.
ان شاء الله استفدتوا من البوست، 
شكرا على مروركم  

You May Also Like

0 comments