مفضلاتي من منتجات مكياجي

by - December 29, 2016

السلام عليكم و رحمة الله و بركاته 


مكياجي اعتقد من الماركات اللي اكثر البنات في فئة عمري كانوا يستخدمونها في فترة من حياتهم. بالنسبة لي، كانت من اول الماركات اللي بديت استخدمها.
قبل فترة لقيت صفحة ماركة مكياجي على انستاقرام، و لقيت انهم بدؤوا بتطوير منتجاتهم و التعليب للمنتجات، و استانست لما دعوني اني التقي معاهم مع كذا بلوقر من ابوظبي عشان نتعرف اكثر على منتجاتهم الجديدة.
شكراً مكياجي...

خلال الفترة الاخيرة صار عندي كمية حلوة من المنتجات كافية اني اكتب عن اللي جربته و حبيته فـ خصصت هذا البوست عشان اتكلم بـإختصار عن المنتجات اللي صدق حبيتها. البوست مقسم على حسب المنتج، اول ٣ منتجات جزء من مجموعة "سبلندور" واللي هي المجموعة المحدودة "لمتد" لفترة الخريف، فـ مو متأكدة لو المنتجات للحين متوفرة او لا.

يلا نبدأ...



Splendour - Smokey Lines Eye Duo 
 قلم كريمي للعين بـجهتين
الدرجة: 902 (برونز)


هذا من احلى المنتجات اللي جربتها و السبب هو الدرجة و التركيبة. القلم متوفر بـ عدة درجات، و متكون من شدو كريمي على جهة، و كحل اسود على الجهة الثانية. ما استخدمت الكحل وايد، لأني افضل الكحل البني، بس انبهرت بالشدو من اول استخدام. الشدو وايد كريمي فـ يتوزع بسهولة على الجفن، و يندمج بشكل حلو و بعدها يجف و يصير ثابت. حلو كـ اساس قبل الشدو الباودر، او بروحه حق ميكب سريع و خفيف.

Splendour - Matte Blush Powder + Brush
بلشر مات + فرشة للبلشر
الدرجة: 701



ثاني شي البلشر الجميل، احلى شي فيه الطبعة اللي عليه اللي ما خلتني استخدم البلشر شهر! بس من تجربتي في الاجتماع اعرف ان البلشر تركيبته وايد حلوة فـ قاومت و استخدمته.
البلشر متوفر بـ٣ درجات كلهم مات. صح ان الفنش للبلشر مات بس ملمسه وايد وايد كريمي و ناعم، و لونه وايد واضح فـ مسحة وحدة منه كافية.

مجموعة "سبلندور" كان فيها بعد فرشة للبلشر وايد حبيتها. اولاً شكلها حلو لأن عليها نفس طبعة البلشر، و ثانياً شعرها (صناعي) واايد ناعم و كمية الشعر اللي فيها وايد فـ تدمج البلشر بسرعة لو ما استخدمت وايد منه.

Splendour - Nail Enemnal Set 
مجموعة اصباغ الاظافر



مكياجي عندهم كذا مجموعة لـ اصباغ الاظافر متوفرين، بس حالياً جربت درجة وحدة من مجموعة الخريف و وايد انبهرت فـ قررت اتكلم عنه بسرعة في هذا البوست. اكثر ماركات اصباغ الاظافر تتفتت او تتقشر على اظافري و هذا الشي وايد يضايقني لأني لازم كل يومين او ثلاث اغير اللون. بس يوم استخدمت صبغ مكياجي ما تفتت ولا تقشر لين ما شلته، يعني تم ٥-٦ ايام على اظافري و شكله تم حلو!

Moisture Plus Lipsticks
ارواج مرطبة
الدرجات: 306 (لحمي/نيود) و 907 (بني)



الهبة في الارواج هذي الفترة هي الارواج المات. لكن اللي تفضل الارواج الخفيفة او الارواج اللي ترطب، انصحها تجرب هذي الارواج. الارواج متوفة بـدرجات مختلفة وايد و تناسب كل الاذواق. تغطية الارواج متوسطة، بس تقدرون تزيدون عليها بـ طبقتين، و الفنش قلوسي تقريباً بس وايد مريحة و خفيفة على الشفايف... و الأحلى ان ريحة الارواج كيك!

سعر الروج: 49 درهم

22K - 12 Hour Vinyl Lipcolor
 ارواج سائلة
الدرجات:  302 (لحمي/نيود) و 902 (نيود مايل على وردي)


هالارواج مثل الارواج اللي تكلمت عنها قبل، تعطي نسبة ترطيب عاالية بس تغطية هذي الارواج اقوى و الفنش كريمي. فكرتهم نفس الارواج السائلة، يتوزعون بسهولة و اللون واضح و قوي، بس الروج ما ينشف و يصير مات. اللي تحب القلوسات بس تفضل ان لون الروج يكون واضح، بتحب هذي الارواج. وايد وايد حلوين و مريحين، بس لأن الروج ما ينشف لـ مات، ممكن يطبع.

سعر الروج: 59 درهم

Cream and Powder Contour Brushes
مجموعة فرش للكونتور البودرة و الكريمي

Left: Cream contour, Right: Powder contour
Top: Contour side, Bottom: Highlight side

من المنتجات اللي حبيت فكرتهم و انبهرت فيهم بعد التجربة هي مجموعة فرش الكونتور. المجموعة متكونة من فرشتين، وحدة للكونتور الكريمي و الثانية للكونتور البودرة. كل فرشة لها صوبين، صوب للكونتور و الصوب الثاني للهايلايت. حبيت المجموعة لأن قصة الفرش غريبة و ما عندي مثل الفرش في مجموعتي.
صح ان المجموعة مخصصة للكونتور، بس تقدرون تستخدمونهم لأي شي بما ان الفرش مصنوعة من شعر صناعي ناااعم. شخصياً، حبيت استخدم جهة الهايلايت على فرشة الكونتور الكريمي للكونتور، و جهة الكونتور لدمج الكونسيلر تحت العين لأن حجمها مناسب لتحت العين. تقدرون بعد تستخدمون الفرش لدمج الفاونديشن. و الحلو في المجموعة انها تكون في حافظة للفرش لأن عادتاً صعب نحط فرش بـطرفيين مع الفرش العادية في الاكواب.

سعر المجموعة: 149 درهم

Fragrance
عطور

و اخر شي بتكلم عن العطور♥ عندي كذا عطر مع بخاخ الجسم بـ كذا ريحة، بس اخترت منهم اللي صدق صدق حبيتهم عشان اتكلم عنهم. بـ صراحة، ما اعرف اوصف الروايح، بس بحاول.


اول واحد اسمه WILD SOUL (٥٠ مل) وايد حبيته في اجتماعي مع مكياجي لما عرفونا على مجموعة العطورات، و استانست يوم لقيت انهم حاطينه لنا في الهدية بعد الاجتماع. بالنسبة لي، ريحته مناسبة للطلعات المسائية بس مو ثقيل وايد. حلو للطلعات الصبح لو خلطت وياه عطر خفيف بـريحة ورد.

سعره: 129 درهم 



 ثاني واحد اسمه COTTON DREAMS (٣٠ مل) من مجموعة الـ لايف ستايل اللي توفرت في شهر ١١. ريحته بودرة على قطن على نظاافة، واايد خفيفة و مناسبة لأي وقت.

اخر شي CITRUS TWIST (٣٠ مل) بعد من مجموعة الـ لايف ستايل، اكتشفته في الفترة الاخيرة و وااااايد حبيته. ريحتة نفس اسمه، فرش على ورد على ليمون على برتقال... ما عرفت احدد الصراحة بس وايد حلوة و ريحة البرتقال خفيفة واااايد. تطلع ريحة العطر احلى لو خلطته ويا عطر ريحته سويت مثل SUGAR CRUSH بعد من نفس المجموعة.

سعر عطور مجموعة الـ لايف ستايل (eau de toilette):
49 درهم

على فكرة، كل عطر عندهم في منه بخاخ للجسم بـ نفس الريحة. انا استخدمت العطور و البخاخات، بس ركزت على العطور عشان ما اطول البوست اكثر.
ان شاء الله استفدتوا من هذا البوست و استمتعتوا في القراءة...

شكراً لكل وحدة قرأت البوست كامل 

You May Also Like

0 comments