محل كلينيك في ابوظبي

by - August 01, 2017

من احلى اللحظات اللي مرت علي من بدأت في عالم التدوين هي يوم ماركة من الماركات اللي احبها او استخدم منتجاتها تلاحظ شغلي و مجهودي.

قبل فترة وصلني بوكس فيه كم منتج من ماركة كلينيك بالإضافة الى رسالة فيها خبر حلو. الخبر ان ماركة كلينيك افتتحت اول محل لها في الشرق الاوسط يكون محل كامل مخصص لمنتجات الماركة. عادتاً ماركة كلينيك تكون متوفرة في المحلات الكبيرة اللي توفر ماركات مختلفة مثل دبنهامز، بس هذا المحل مخصص للماركة و متوفرة فيه منتجات التجميل و العناية بالبشرة. الأحلى ان المحل في واحد من افضل المولات عندي في ابوظبي — الوحدة مول — لأنه يضم محلات و ماركات متنوعة و موقعه في وسط المدينة. 


اول شي وصلني فالبوكس هو المرطب الموجود في الصورة، بالاضافة الى ثلاث ارواج مات. حالياً ما بدأت اجرب المرط عشان اعرف لو يناسب بشرتي او لا، بس ملمسه مثل ملمس البرايمرات السيليكون اللي تملي المسام و تخلي ملمس البشرة ناعم. شخصياً افضِّل البرايمرات و المرطبات اللي تعطي ترطيب للبشرة عشان تبيّن البشرة صحية تحت الفاونديشن، بس بين فترة و فترة استخدم برايمرات السيليكون في المناسبات عشان اوحد شكل سطح البشرة، فـ حابة اني اجرب المرطب و اجوف نتيجته ويا الفاونديشن خصوصاً انه المفروض يناسب البشرة الدهنية.




بالإضافة الى المرطب، وصلتي ثلاث درجات من ارواج مجموعة pop اللي هي ارواج مات. شخصياً ما احب معظم الارواج الوردية على بشرتي، بس من احلى الدرجات عندي هي النود و المارونية او الاحمر. درجة النود حبيتها واااايد لأن درجتها وايد قريبة من لون شفايفي، فـ تبيّن طبيعية و مناسبة لطلعات الصبح او حتى للمناسبات لو حابة احط روج لونه فاتح. اما الدرجة المارونية حسيت اني اول ما احطها اللون ما يكون متساوي ١٠٠٪‏، بس مع كذا طبقة او مع محدد يطلع شكلها حلو. الحلو في الارواج ان التركيبة جداً خفيفة فـ حتى لو حطيت اكثر من طبقة ما احس اني حاطة طبقات على شفايفي. الروج يعطي فنش مات اقرب للساتن، بس ما ينشف الشفايف، بالعكس التركيبة وايد مريحة. اللون يخف مع الاكل طبعاً، بس اللون الماروني يخلي صبغة خفيفة على الشفايف حتى بعد الاكل.

 اخر شي كان في البوكس هي دعوة اني ازور محل كلينيك في الوحدة مول عشان اختار منتجات انا شخصياً حابة اجربها.



اول منتج اخترته سمعت عليه مدح وايد و اللي هو الفاونديشن Beyond Perfecting foundation + concealer. هذا الفاونديشن يعتبر ٢ في واحد لأن تغطيته ميديم الى فل، فـ ممكن انه يُستخدم كـ فاونديشن او كونسيلر على مناطق محدده. الفاونديشن يعطي فنش طبيعي الى مات، يعني مناسب للبشرات المختلطة او الدهنية. ممكن ان نزيد التغطية الى فل، بس المفروض ان يكون مريح و خفيف على البشرة. الدرجة اللي اختارتها لي الموظفة رقم ٩ نيوترل. الدرجة وايد قريبة من لون بشرتي، بس لما قارنتها ويا كم فاونديشن من مجموعتي لاحظت ان الاندرتون مايل على احمر و انا افضل ان الاندرتون يكون نيوترل مايل للصفار. ما حبيت اني اخذ الدرجة الافتح او درجة دافية عشان ما تقلب علي رمادي او تبيّن غامقة.


ثاني شي اخترته هو التونر، لأني جفته عند اختي من فترة و حبيت اجربة بنفسي. مثل معظم منتجات كلينيك للعناية بالبشرة، التونر متوفر بـ كذا نوع لكل انواع البشرة. انا اخترت التونر للبشرة المختلطة مايلة للدهنية، واللي حمسني عليه اكثر ان التونر يعطي تقشير خفيف عشان ينعم ملمس البشرة و يعطيها اشراقة صحية.


اخر منتج اخترته هو جهاز تنظيف البشرة. بكل صراحة، انا عندي جهاز الكلاريسونك (حجم البلاس — هذا البوست) و كاتبه عنه بوست قبل، بس اللي يضايقني في الجهاز ان حجمة كبير يعني ابداً ما يناسب اني اخذه وياي في سفراتي. اللي حبيته في هذا الجهاز ان حجمه وايد عملي لإستخدام يومي و للسفرات. الجهاز فيه عزل ضد الماي يعني ممكن ان نستخدمه فالشاور، و ممكن نشحن بطاريته (لمدة ٢٤ ساعة شحن) و بعدها نقدر ناخذه في سفراتنا بدون ما ناخد جهاز الشحن بعد لأن البطارية الكاملة تدوم لمدة ٣ ساعات استخدام. 


وايد انصح كل بنت تستخدم مكياج بشكل يومي او اسبوعي انها تجرب اي جهاز لتنظيف البشرة يناسبها و يناسب ميزانيتها، لأني ذكرت هالشي في بوست ريڤيو فاونديشن ميك اب فور افر (هذا البوست)، التنظيف بـ مزيلات المكياج مرة وحدة ما يكفي ابداً و لازم تتبعين خطوتين او اكثر في روتين ازالة المكياج و تنظيف البشرة. سعر الجهاز ٥٩٠ درهم.


شكراً فريق كلينيك، و مبروك على الافتتاح! 

ان شاء الله استفدتوا من هذا البوست و استمتعتوا في القراءة 

You May Also Like

0 comments