منتجات جديدة من هيمالايا — مجموعة النيم

by - August 30, 2017


اعرف ان وايد بنات ما يحبون يصرفون مبالغ كبيرة على منتجات التجميل و العناية بالبشرة، خصوصاً لو ما كانوا متأكدين ان هالمنتجات بتنفعهم. لهالسبب، وايد استانست يوم وصلتني منتجات ما كنت متوقعتها، هالمنتجات متوفرة للجميع فالصيدليات او السوبر ماركت و اسعارها معقولة.
حسيت انها فرصة حلوة اني اجرب المنتجات اللي ما جربتها و اكتب تجربتي عشان الكل يستفيد، بس فالبداية حبيت اعرض المنتجات.


المنتجات في هذا البوست من ماركة هيمالايا، وحدة من الماركات اللي بديت استخدمها من سنين. 
ما كنت اعرف هالمعلومة قبل، بس المنتجات في هذا البوست "cruelty free" معناتها الماركة ما تختبر على الحيوانات. 


ببدأ البوست بواحد من المنتجات اللي كنت استخدمها من سنين و اللي هو ماسك التنقية بعشبة النيم (للبشرة العادية الى دهنية). هذا الماسك من افضل الماسكات اللي جربتها و السبب هو الحبيبات اللي فيه. المكونات الأساسية فيه هي عشبة النيم و الكركم، يساعدون على تنظيف المسام و يخففون من الحبوب على البشرة. الماسك عبارة عن ماسك كريمي لونه اسود فيه حبيبات صغيرة، ينحط على البشرة و ينشف و بعدها ينغسل. بعد ما ينشف ابلل اصابعي و ابدأ ادلك البشرة عشان استفيد من الحبيبات كـ مقشر لطيف. اهم شي انكم ما تخلونه فترة طويلة لأن كل ما طوّل على البشرة تصير ازالته صعبة. لونه يتغير لرمادي فاتح يوم ينشف فـ بتعرفون متى تغسلونه. 

ثاني منتج هو واحد من المنتجات الجديدة في المجموعة فـ اول مرة اسمع عنه بس جربته كم مرة قبل ما اكتب هذا البوست. المنتج هو مقشر النيم اليومي لتنقية البشرة (للبشرة العادية الى دهنية)، و مكوناته الأساسية هي عشبة النيم و المشمش. عشبة النيم تساعد على تنقية البشرة و حبيبات المشمش تقشر البشرة و تخفف من الرؤوس السوداء. المقشر تركيبته كريمية فيه حبيبات صغيييرة، من تجربتي حسيت انه فعلاً مناسب كـ مقشر يومي للي حابة او حتى لإستخدام مرتين او ثلاث اسبوعياً. 

ثالث منتج ما اعتقد اني جربته قبل ولا لقيت فرصة اجربه قبل هذا البوستى بس هو عبارة عن غسول لتنقية البشرة (للبشرة العادية الى دهنية). مكونات الغسول الأساسية هي عشبة النيم و الكركم، يساعدون في تخفيف من الحبوب و التصبغات على البشرة. 


رابع منتج قبل ما اتكلم عن الماسكات، هو منتج بعد جديد في المجموعة على حد علمي لأني اول مرة اسمع عنه. المنتج هو مناديل (وايبس) النيم المنقية للبشرة (للبشرة العادية الى دهنية). تركيبتها خالية من الكحول، فالمفروض انها ما تحسس ولا تنشف البشرة.
بكل امانة شخصياً ما احب استخدم وايبس لإزالة المكياج، بس يوم توصلني وايبس للتجربة احب اعطيهم فرصة. السبب هو ان مريت في فترة اي وايبس استخدمه يحسس شفايفي و ينفخها، فـ لو بجرب وايبس احاول اجربهم في يوم ما عندي طلعة بعدها. جربت هذا النوع و الحمد لله ما حسس شفايفي. التركيبة منعشة و لطيفة على البشرة. جربتها لإزالة مكياج كامل و حسيت انها تنفع لمكياج البشرة بس مكياج العين لازم كم مسحة عشان اتخلص منه كامل تقريباً و السبب ان رطوبة الوايبس خفيفة و ممكن تجف بسرعة. طبعاً ما انصح انكم تستخدمون وايبس بس لإزالة المكياج كامل، لازم خطوة او خطوتين زيادة عشان تكون بشرتكم ١٠٠٪‏ نظيفة بعدها (تقريباً). 


اخر مجموعة من المنتجات هي الماسكات اللي تجف و بعدها تتقشر من على البشرة. وصلتني ثلاث انواع واللي هي: ماسك النيم لتنقية البشرة (للبشرة العادية الى مختلطة)، ماسك اللوز و الخيار لترطيب البشرة (للبشرة العادية الى جافة) و ماسك البرتقال لإزالة الاسمرار (لجميع انواع البشرة). 
لحد الحين جربت ماسك واحد من المجموعة واللي هو ماسك النيم لأن بشرتي مختلطة. مثل اول ماسك تكلمت عنه، مكونات هذا الماسك الأساسية هي عشبة النيم و الكركم، بس هذا الماسك يجف على البشرة و بعدين تقشرونه بدون ماي. تركيبته مثل الجل، يتوزع بسهولة على البشرة. انصح انكم تستخدمون اصابعكم لتوزيعه بدل فرشة الماسكات، لأن ممكن يجف على الفرشة و تصير صعبة ازالته. بعد ثواني من توزيعه يبدأ يحرق البشرة بس على خفيييف. شخصياً حسيت ريحته ريحة كحولة قوية و ضايقتني شوي بس اول ما يبدأ يجف تخف الريحة.  بعد ما اقشره، ما حسيت انه يجفف بشرتي. بالعكس يخلي البشرة صحية و ناعمة و احس انه مناسب نستخدمه قبل ماسكات الترطيب عشان تزيل اي شي من على سطح البشرة و بعدين نرطبها. وايد حبيت نتيجته.

اتمنى انكم استفدتوا او استمتعتوا بقراءة هذا البوست.
شكراً فريق هيمالايا! 

You May Also Like

0 comments