ريڤيو + تجربتي: منتجات ماركة قلوسييه | Glossier

by - April 16, 2018

السلام عليكم،

من فترة طويلة ما نزلت بوستات على البلوق. من بديت البلوق كنت حاطة في بالي اني اخصصه للمواضيع الطويلة بس للأسف هذا النوع من البوستات ياخذ مني وقت، فـمن احصل اجازة على طول ابدا اخطط عن شو بتكلم، مرات الحق اكتب البوستات و مرات لا 😂


المهم، موضوع اليوم بيكون عن تجربتي لمنتجات ماركة قلوسييه الامريكية. صار لي فتتررة اتابع الماركة على انستاقرام و مغرمة بشكل المنتجات، التسويق و التعليب، بس للأسف الماركة ما تشحن الا لبلدان معدودة.
الماركة مشهورة في امريكا، و قبل فترة توسعوا لبريطانيا فممكن سمعتوا وايد يتيوبرز يتكلمون عنها، بس للأسف عدد البنات اللي يتكلمون عنها في منطقة الخليج جداً قليل.
الماركة تركيزها على العناية بالبشرة، بس عندهم ميكب بعد. فكرة الميكب انه خفييف و يبرز جمال الشخص. تركيزهم وايد على الترطيب و البشرة الصحية، و قبل فترة نزلوا عطر و منتجين للجسم و شدوات كريميه. بما ان ميولي اكثر للميكب، حبيت ابدأ تجربتي بكم منتج من منتجات الميكب و بعدها ان شاء الله حابة اجرب منتجات العناية بالبشرة مثل السيروم و المرطب و الغسول.
قبل كم شهر اكتشفت ان ممكن نستخدم شركة شحن تشحن لنا طلبنا من الماركة، بس بما اني ما جربت اطلب منهم من قبل قررت اجرب اطلب من خلال التاجرات اول. اخترت كم منتج اجربهم فالبداية، و في نفس الفترة وصلتني ٤ منتجات من تاجرة (شكراً!). بعد تجربتي الاولى قررت اجرب درجات زيادة من المنتجات اللي عندي فـطلبت مرة ثانية.

في هذا البوست بتكلم عن المنتجات اللي عندي حالياً، شو حبيت فيهم و شو ما ناسبني و ان شاء الله اللي حابة انها تجرب الماركة تستفيد من هذا البوست.

بوستاتي على انستاقرام عن الماركة: ١ | ٢ ٣

لنك خصم ١٠٪: 10% off referral link

نقطة حبيت اذكرها قبل ما ابدأ اتكلم عن المنتجات ان على موقع قلوسييه بتلقون عندهم كذا مجموعة من المنتجات او من نفس المنتج بس بدرجات مختلفة من اختياركم. مثلاً، عندهم مجموعة اسمها Phase 2 set فيها الكونسيلر و روج و مسكرا حواجب و كل الدرجات من اختياركم. هالمجموعات لو طلبتوها بدل ما تطلبون كل منتج بروحه توفرون كم دولار من السعر. وايد حبيت هالفكرة و اتستغليتها في طلباتي.



قبل ما اقرر اني اجرب الكونسيلر كنت ناوية اجرب التنت (بديل الفاونديشن) بس بعدها استوعبت ان تغطيته تقريبا ٠ و حسيت الكونسيلر ممكن استفيد منه اكثر.
الكونسيلر حالياً متوفر بـ٥ درجات. فالبداية اخترت درجة 'دارك' بس حسيت انها شوي غامقة علي فخذت درجة 'ميديم'. بعد ما جربت الدرجتين حسيت اني ممكن استدخم الدرجتين على حسب لون الفاونديشن و ممكن بعد اخلطهم. 
تركيبة هذا الكونسيلر وايد غريبة علي و من الحين اقول للي تحب الكونسيلر المات الثابت بتغطية عالية، غالباً ما بتحب هذا. تريكبة الكونسيلر وايد رطبة. على اسمه، يتوزع بسهولة و يغطي مناطق كبيره من البشرة حتى لو مستخدمين كمية بسيطة. الكونسيلر ما يثبت و يتم شبة رطب على البشرة فلازم على طول اثبته ببودرة. انا عندي خط تحت عيني طبيعي فالكونسيلر يخطط علي بس مع هذا حبيته لانه خفيف و عملي حق استخدام يومي. الحلو فيه ان ممكن استخدمه تحت العين او اي منطقة على البشرة، ما يطلع شكله كيكي ابداً، بالعكس يعطي تغطية خفيفة و يخلي شكل البشرة صحي و مترطب. 
وايد من اللي اتابعهم يتسخدمون منتجات قلوسييه يوزعون المنتجات بالصابع بس شخصياً افضل اني استخدم فرش. للكونسيلر استخدم اي فرشة كونسيلر كابوكي مدورة للتوزيع و الدمج.


اكثر منتج حبيته من الماركة هي البلشرات. البلشرات حايلاً متوفرة بـ٤ درجات، انا طلبت درجتين و وصلوني درجتين هدية فصارت عندي الدرجات كلها.
تركيبة البلشرات بين الكريم و السائل، يعني سائلة بس ما تسيح بسرعة. الدرجات وااضحة و كمية بسيطة تكفي للخدين و تزيد بعد. الحلو فالبلشرات ان حتى لو كثرتي منهم بالغلط، يندمجون بسهووولة و ممكن تخففين اللون على طول. اكثر شي حبيته اني اقدر اخلط بين الـ٤ درجات عشان اسوي اي درجة في بالي من بين الدرجات المتوفرة. 
نفس ما ذكرت قبل، شخصياََ احاول ما استخدم اصابعي في دمج الميكب فـمخصصة لي فرشة دوو فايبر من زويڤا رقمها  ١٢٢ تدمج البلشرات او اي منتج كريمي بسهولة. 


Shade shown: Quartz
الهايلايترات من قلوسييه حايلاً متوفرين بـ ٣ درجات. انا عندي الدرجة الفاتحة و الوسط. فكرة الهايلايتر انه متكون من قسمين، القسم اللي فالنص عبارة عن 'بالم' يعطي البشرة لمعة صحية و يخلي شكلها مترطب و القسم اللي برا فيه اللون و اللمعة. 
لمعة الهايلايتر جداً خفيفة، و البالم يخلي شكل البشرة مترطب، بس اللي بشرتها دهنية لا تكثر منه. هذا المنتج يناسب ذوق معين فالميكب. اللي تحب الهايلاتر الواضح ممكن يكون خفيف او رطب بالنسبة لها و ممكن ما تحبه، بس اللي تحب لوك البشرة الصحية و الميكب الـ'dewy' انصحها تجرب الدرجة اللي تناسبها.
بصراحة، فالبداية حسيت ان درجة 'moonstone' مالها داعي عندي لأن بشرتي تعتبر ميديم و الدرجة المتوسطة تناسب بشرتي اكثر. الدرجة هذي تقريباً بدون لون بس لمعتها اندرتونها ازرق. اللمعة جداً جداً خفيفة و انا كنت متوقعة ان بيكون فيها لون سلڤر فطلبتها كتغير، بس كل ما استخدمتها حبيتها اكثر و حسيت ان ما عندي هايلايتر يشابه هالدجة. هالدرجة مناسبة للأيام اللي ابا احط ميكب خفيف بس مابا يكون الهايلاتر بارز.
بما ان الهايلاتر متكون من جزئين، احب احطه على اصابعي و بعدين اطبطب على البشرة عشان ادمجه زين، و مرات استخدم اسفنجة مبللة بس الاسفنجة تخفف من اللمعة. افضل طريقة لتوزيع هذا الهايلاتر من تجربتي هي الاصابع. 




الارواج بعد من المنتجات اللي كنت متحمسة لها اكثر شي. اللي تتابع بوستاتي على انستاقرام تعرف اني احب الارواج الخفيفة للإستخدام اليومي. ارواج قلوسييه، حالياً متوفرة بـ٦ درجات، فكرتها انها تعطي لون خفيف 'شير' ممكن ان تزيدون عليه كم طبقة عشان تكون بارزة اكثر شوي. 
انا عندي ٥ درجات من الارواج، ٢ نود و ٣ بدرجات الاحمر و البنفسجي/ماروني. بالنسبة لي صعب اني ازيد من بقمنت درجة النود ‘cake’ لان لونها مقارب للون شفايف، بس الدرجات الملونة تكون واضة من اول مسحة (واضحة بس البقمنت خفيف).الفنش في لمعة خفيفة بس مو قلوسي. الارواج مريحة بس ممكن تبرز جفاف الشفايف. 
الشي اللي خلاني ما استخدم الارواج كثر ما كنت متوقعة بستخدمهم هو الباكجنق، و لهذا السبب اي وحدة تفكر تشتريهم انصحها ما تاخذها لين ما يغيرون الباكيجنق او انها تكون حذرة و تعاملهم مثل البيبي. اولا، الباكجنق بلاستيك خفيف و بعد اقل من شهر غطاء روجين من الارواج اللي عندي بدأ يتكسر (صورتهم لكم)، و روج ثاني جزء اللون من الروج انفصل عن الباكيجنق. 



بصراحة ما كنت ناوية اجرب القلوس لأن ما حسيت انه شي ضروري يكون عندي، بس يوم كنت ابا اشتري الارواج لقيت عندهم مجموعة فيها روج من اختياركم و القلوس قلت ليش لا، بجربه.
القلوس متوفر بدرجة وحدة 'بدون لون'. فالباكجنق طالع لونه وردي بس على الشفايف ما يعطي لون. القلوس حلو، تركيبته ثقيلة و لزج او sticky على الشفايف، بس نتيجته حلوة. مافيه حبات قلتر او شيمر، بس لمعته قوية.
بكل صراحة، ما احس انه منتج اساسي بالنسبة لي مع اني احب القلوس، بس ممكن تلقون قلوس مشابه له من ماركات ثانية و اكيد بسعر ارخص. بس اللي تحب القلوس ممكن تجربه. 




من المنتجات اللي سمعت عليها مدح وايد هي مسكرة الحواجب. المسكرا متوفرة بـ٣ درجات بالاضافة الى درجة بدون لون، يعني ٤ درجات: اسود، بني، اشقر و بدون لون. 
مثل ما ذكرت قبل، لقيت على الموقع مجموعة فيها الكونسيلر و الروج و المسكرا و بما اني كنت بطلب الكونسيلر و الروج طلبت المجموعة مرتين (عشان درجة الكونسيلر و الروج) فـخذت المسكرا بدرجة البني و بدون لون. حالياََ استخدم المسكرا البنية.
المسكرا بالنسبة لي حجمها صغير و احس الكمية اللي فيها شوي مقارنة بمسكرات الحواجب اللي استخدمتها قبل، بس الحلو فيها فرشتها. الفرشة وايد صغيرة تنفع للي حواجبها خفيفه و حتى للي حواجبها عريضة عشان ما تكثر من البرودكت. الفرشة تذكرني بمسكرة بنفت قبل ما ينزلون مجموعة الحواجب الجديدة، بس شخصياً ما جربتها عشان اقارن. 
المسكرا حلوة، تبرز شعرات الحواجب شعرة شعرة بس بشكل طبيعي، تعطي لون خفيف بس ما تعبي الفراغات. احب استخدمها للأيام اللي ما عندي وقت اعبي الحواجب او ابا ميكب خفيف، بس بعد حلوة بعد ما اعبي الحواجب. ماحسيت انها تمسك الحواجب لفترة طويلة، فممكن اللي شعرات حواحبها سميكة ما تستفيد منها. بإختصار، مثل القلوس، نتيجتها حلوة بس ممكن تلقون مسكرات احسن منها. ما ندمت اني خذتها بس ما احس انها من المنتجات اللي ضروري اشتريها مرة ثانية. 

هذي كل المنتجات اللي عندي حالياً من ماركة قلوسييه.
خبروني فالكومنتس تحت هذا البوست او على انستاقرام شو من المنتجات اللي تكلمت عنها ودكم تجربون؟ 
ان شاء الله استفدتوا من هذا البوست. 

You May Also Like

0 comments